គួរឱ្យសោកស្ដាយមានករណីអគ្គីភ័យមួយបានលេបត្របាក់ផ្ទះប្រជាពលរដ្ឋនៅក្រុងស្វាយរៀងសល់តែ…

ខេត្តស្វាយរៀង៖  មានអគ្គីភ័យមួយឆាបឆេះផ្ទះបងប្អូនប្រជាពលរដ្ឋ២ខ្នងក្លាយជាផេះផង់ ឆេះទាំងទ្រព្យសម្បត្តិរួមមាន (មាស ប្រាក់ ស្រូវ អង្ករ និងសំលៀកបំពាក់ មុង ភួយ កន្ទេល ខ្នើយឆេះអស់គ្មានសល់សល់តែខោអាវជាប់ខ្លួនតែ១ចង្កេះ) ។

ករណីនេះបានកើតឡើងកាលពីវេលាម៉ោង៤និង៥០នាទីល្ងាចថ្ងៃពុធទី២៨ ខែធ្នូ ឆ្នាំ២០២២ នៅភូមិសាមគ្គី សង្កាត់ស្វាយតឿ ក្រុងស្វាយរៀង ខេត្តស្វាយរៀង។

បើតាមសមត្ថកិច្ចបានឲ្យដឹងថា៖ ផ្ទះ ដែលត្រូវភ្លើងឆាបឆេះ ទំហំ  ៦ម៉ែត្រX ៧ម៉ែត្រ សង់អំពីឈើលើ ថ្មក្រោម ជណ្តើរថ្ម ជញ្ជាំងឈើ រនាបក្តា ដំបូលប្រក់ក្បឿងឆេះអស់ទាំងស្រុង សល់តែសំយ៉ាបនិងគម្របជណ្តើរ ។

ទ្រព្យសម្បត្តិដែលខូចខាតរួមមាន៖
ឯកសារប្លង់ដី សំបុត្រកំណើត និងឯកសារផ្សេងៗ ជាច្រើនទៀតព្រមទាំងទូរទស្សន៍១គ្រឿង កង្ហា៣គ្រឿង កងដៃកូន១កង ទម្ងន់១ជីកន្លះ មាស០៣តម្លឹង ប្រាក់ដុល្លារចំនួន៦,០០០ដុល្លារ ស្រូវ អង្ករ និងសំលៀកបំពាក់ មុងភួយ កន្ទេលខ្នើយ ចានឆ្នាំងស្លាបព្រា ,ធុងបាស១គ្រឿង  ឆេះអស់គ្មានសល់។

ប្រភពបន្តថា៖ ម្ចាស់ផ្ទះជនរងគ្រោះឈ្មោះកែវ យ៉ាំ ភេទស្រី អាយុ៦២ឆ្នាំ មុខរបរធ្វើស្រែ មានសមាជិកគ្រួសារ៥នាក់ស្រី៤នាក់ ។

ប្រភពបន្តថា ៖ មុនពេលកើតហេតុសមាជិកគ្រួសារបានចេញទៅធ្វើការរោងចក្រអស់នៅសល់តែម្តាយ មានជម្ងឺប្រចាំកាយពិការមួយចំហៀងខ្លួន នៅចាំផ្ទះ ស្រាប់តែឆ្លងចរន្តអគ្គីសនីនៅក្នុងផ្ទះ( ផ្ទុះសេខ្សែភ្លើងឆាបឆេះផ្ទះតែម្តង)។

ប្រភពដែលឃើញហេតុការណ៍ៈ គេបានឃើញស្រ្តីម្ចាស់ផ្ទះបានរត់ចេញពីផ្ទះហើយបានស្រែកហៅអ្នកស្រុកជិតខាងឲ្យជួយពេលនោះអ្នកស្រុកក៏បានទូរសព្ទ័ហៅរថយន្តពន្លត់អគ្គីភ័យរបស់អធិការនគបាលស្រុកស្វាយទាប១គ្រឿងនិងរថយន្តពន្លត់អគ្គីភ័យអធិការដ្ឋាននគបាលក្រុងស្វាយរៀង១គ្រឿងមកជួយបាញ់ពន្លត់ ក៏ប៉ុន្តែទំរាំមកដល់ភ្លើងបានឆាតឆេះអស់ទៅហើយ ម៉្យាងទៀតមានខ្យល់ខ្លាំង ផ្ទះគ្រឿងឈើស្ងួតផងគឺឆេះតែ២០នាទីសោះអស់គ្មានសល់។

ក្នុងករណីអាគីភ័យខាងលើសរុបបានប្រើប្រាស់រថយន្តពន្លត់អគ្គីភ័យ២គ្រឿង ក៏មិនអាចជួយសង្គ្រោះទាន់គឺសល់តែជញ្ជាំងឥដ្ឋ និងជណ្តើរថ្ម ហើយនិងសំយ៉ាបគ្របដំបូល។

ករណីអគ្គីភ័យនេះគួរឱ្យសោកស្តាយផង ដែរស្រ្តីម្ចាស់ផ្ទះស្រែកទ្រហោយំថា( ផ្ទះ២ខ្នងនេះគាត់លក់ដីស្រែយកមកសង់ផ្ទះពេលនេះឆេះអស់គ្មានសល់អ្វី សល់តែខោអាវ១ចង្កេះជាប់និងខ្លួន) ៕